बृहत्पाराशरहोराशास्त्रम् 46.46
अथ दशाध्याय ||४६||
अध्ययन · संस्कृत · शास्त्रीय संदर्भSTUDY · SANSKRIT · CLASSICAL REFERENCES
बृहत्पाराशरहोराशास्त्रम् · अध्याय 46 · अध्यायः ४६ (दशाध्यायः)
97 अध्यायों की सूची; 91 अध्यायों का पाठ उपलब्ध। अध्याय 16, 18, 20, 22, 23 और 35 में स्रोत का गलत दोहराव मिलने से पाठ रोका गया है। यह अभी पूर्ण BPHS नहीं है।
मूल मुद्रित संस्करण से पूर्ण प्रूफरीड शेष है। OCR/टाइपिंग त्रुटियाँ और संस्करणों के पाठभेद संभव हैं। अनुवाद जहाँ उपलब्ध है वहीं दिखता है। मशीन अनुवाद का मसौदा और संपादक द्वारा जाँचा अनुवाद अलग चिह्नित हैं।
स्रोत में दोहराए श्लोक क्रमांक मिले; पहली प्रति रखी गई।
बृहत्पाराशरहोराशास्त्रम् 46.1
सर्वज्ञोऽसि महर्षे त्वं कृपया दीनवत्सल |
दशाः कतिविधाः सन्ति तन्मे कथय तत्त्वतः ||१||
बृहत्पाराशरहोराशास्त्रम् 46.2
साधु पृष्टं स्वया विप्र लोकानुग्रहकारिणा |
कथयामि तवाग्रेऽहं दशभेदाननेकशः ||२||
बृहत्पाराशरहोराशास्त्रम् 46.3
दशाबहुविधास्तासु मुख्या विंशोत्तरी मता |
कैश्चिदष्टोत्तरी कैश्चित् कथिता षोडशोत्तरी ||३||
बृहत्पाराशरहोराशास्त्रम् 46.4
द्वादशाब्दोत्तरी विप्र दशा पञ्चोत्तरी तथा |
दशा शतसमा तद्वत् चतुराशीतिवत्सरा ||४||
बृहत्पाराशरहोराशास्त्रम् 46.5
द्विसप्ततिसमा षष्टिसमा षड्त्रिंशवत्सरा |
नक्षत्राधारिकाश्चेताः कथिताः पूर्वसूरिभिः ||५||
बृहत्पाराशरहोराशास्त्रम् 46.6
अथा कालदशा चक्रदशा प्रोक्ता मुनीश्वरैः |
कालचक्रदशा चाऽया मान्यासर्वदशासु या ||६||
बृहत्पाराशरहोराशास्त्रम् 46.7
दशाऽथ चरपर्याया स्थिराख्या च दशा द्विज |
केन्द्राद्य च दशा ज्ञेया कारकादिग्रहोद्भवा ||७||
बृहत्पाराशरहोराशास्त्रम् 46.8
ब्रह्मग्रहाश्रितर्क्षाद्या दशा प्रोक्ता तु केनचित् |
माण्डूकी च दशा नाम तथा स्थूलदशा स्मृता ||८||
बृहत्पाराशरहोराशास्त्रम् 46.9
योगार्धजदशा विप्र दृग्दशा च ततः परम् |
त्रिकोणाख्या दशा नाम तथा राशिदशा स्मृता ||९||
बृहत्पाराशरहोराशास्त्रम् 46.10
पञ्चस्वरदशा विप्र विज्ञेया योगिनीदशा |
दशा पैण्डी तथांशी च नैसर्गिकदशा तथा ||१०||
बृहत्पाराशरहोराशास्त्रम् 46.11
अष्टवर्गदश सन्ध्यादसा पाचकसंज्ञिका |
अन्यास्तारादशाद्याश्च न स्वर्गाः सर्वसम्मताः ||११||
बृहत्पाराशरहोराशास्त्रम् 46.12
कृत्तिकातः समारभ्य त्रिरावृत्य दशाधिपाः |
आचंकुरागुशबुकेशुपूर्वा विहगाः क्रमात् ||१२||
बृहत्पाराशरहोराशास्त्रम् 46.13
वह्निभाज्जन्मभं यावद् या संख्या नवतष्टिता |
शेषाद्दशाधिपो ज्ञेयस्तमारभ्य दशां नयेत् ||१३||
बृहत्पाराशरहोराशास्त्रम् 46.14
विंशोत्तरशतं पूर्णमायुः पूर्वमुदाहृतम् |
कलै विंशोत्तरी तस्माद् दशा मुख्या द्विजोत्तम ||१४||
बृहत्पाराशरहोराशास्त्रम् 46.15
दशासमाः क्रमादेषां षड् दशाऽश्वा गजेन्दवः |
नृपाला नवचन्द्राश्च नवचन्द्रा नगा नखाः ||१५||
बृहत्पाराशरहोराशास्त्रम् 46.16
दशामनां भयातघ्नं भभोगेन हृतं फलम् |
दशाया भुक्तवर्षाद्य भोग्यं मानाद् विशोधितम् ||१६||
बृहत्पाराशरहोराशास्त्रम् 46.17
लग्नेशात् केन्द्रकोणस्थे राहौ लग्नं विना स्थिते |
अष्टोत्तरी दशा विप्र विज्ञेया रौद्रभादितः ||१७||
बृहत्पाराशरहोराशास्त्रम् 46.18
चतुष्कं त्रितयं तस्मात् चतुष्कं त्रितयं पुनः |
एवं स्वजन्मभं यावद् विगणय्य यथाक्रमम् ||१८||
बृहत्पाराशरहोराशास्त्रम् 46.19
सूर्यश्चन्द्रः कुजः सौम्यः शनिर्जीवस्तमो भृगुः |
एते दशाधिपा विप्र ज्ञेयाः केतुं विना ग्रहाः ||१९||
बृहत्पाराशरहोराशास्त्रम् 46.20
रसाः पञ्चेन्दवो नागाः सप्तचन्द्राश्च खेन्दवः |
गोऽब्जाः सूर्याः कुनेत्राश्च रव्यादीनां दशासमाः ||२०||
बृहत्पाराशरहोराशास्त्रम् 46.21
दशाब्दांघ्रिश्च पापानां शुभानां त्र्यंश एव हि |
एकैकभे दशामानं विज्ञेयं द्विजसत्तम ||२१||
बृहत्पाराशरहोराशास्त्रम् 46.22
ततस्तद्यातभोगाध्यां भुक्तं भोग्यं च साधयेत् |
विंशोत्तरीवदेवात्र ततस्तत्फलमादिशेत् ||२२||
बृहत्पाराशरहोराशास्त्रम् 46.23
कृष्णपक्षे दिवा जन्म शुक्लपक्षे तथा निशि |
तदा ह्यष्टोत्तरी चिन्त्या फलार्थञ्च विशेषतः ||२३||
बृहत्पाराशरहोराशास्त्रम् 46.24
चन्द्रहोरागते कृष्णे सूर्यहोरागते सितेए |
लग्ने नृणां फलज्ञप्त्यै विचिन्त्या षोडशोत्तरी ||२४||
बृहत्पाराशरहोराशास्त्रम् 46.25
पुष्यभाज्जन्मभं यावद् या संख्या गजतष्टिता |
रविर्भौमो गुरुर्मन्दः केतुश्चन्द्रो बुधो भृगुः ||२५||
बृहत्पाराशरहोराशास्त्रम् 46.26
इति क्रमाद् दशाधीशाः ज्ञेया राहुं विना ग्रहाः |
रुद्राद्येकोत्तराः संख्या धृत्यन्तं वत्सराः क्रमात् ||२६||
बृहत्पाराशरहोराशास्त्रम् 46.27
शुक्रांशके प्रजातस्य विचिन्त्या द्वादशोत्तरी |
जन्मभात् पौष्णभं यावत् संख्या हि वसुतष्टिता ||२७||
बृहत्पाराशरहोराशास्त्रम् 46.28
सूर्यो गुरुः शिखी ज्ञोऽगुः कुजो मन्दो निशाकरः |
विना शुक्रं दशाधीशा द्विचयात् सप्ततः समाः ||२८||
बृहत्पाराशरहोराशास्त्रम् 46.29
अर्कांश कर्कलग्ने पञ्चोत्तरी मता |
मित्रर्क्षाज्जन्मभं यावत् संख्या सप्तविभाजिता ||२९||
बृहत्पाराशरहोराशास्त्रम् 46.30
एकादिशेषे विज्ञ्याः क्रमात्सप्तदशाधिपाः |
रविर्ज्ञोऽर्कसुतो भौमः शुक्रश्चन्द्रो वृहस्पतिः ||३०||
बृहत्पाराशरहोराशास्त्रम् 46.31
एकोत्तराच्च विज्ञेया द्वादशाद्याः क्रमात्समाः |
धृत्यन्ताः सप्तखेटानां राहुकेतू विना द्विज ||३१||
बृहत्पाराशरहोराशास्त्रम् 46.32
वर्गोत्तमगते लग्ने दशा चिन्त्या शताब्दिका |
पौष्ण्भाज्जन्मपर्यन्तं गणयेत् सप्तभिर्भजेत् ||३२||
बृहत्पाराशरहोराशास्त्रम् 46.33
शेषाङ्के रवितो ज्ञेया दशा शतसमाह्वया |
रविश्चन्द्रो भृगुर्ज्ञश्च जीवो भौमः शनिस्तथा ||३३||
बृहत्पाराशरहोराशास्त्रम् 46.34
क्रमदेते दशाधीशा बाणा बाणा दिशो दश |
नखा नखाः खरामाश्च समाज्ञेया द्विजोत्तम ||३४||
बृहत्पाराशरहोराशास्त्रम् 46.35
कर्मेशे कर्मगे ज्ञेया चतुराशीतिका दशा |
पवनाज्जन्मभं यावद् या सण्ख्या सप्तभाजिता ||३५||
बृहत्पाराशरहोराशास्त्रम् 46.36
शेषे रवीन्दुभौमज्ञा गुरुशुक्रशनैश्चराः |
दशाधीशाः क्रमादेषां ज्ञेया द्वादशवत्सराः ||३६||
बृहत्पाराशरहोराशास्त्रम् 46.37
मूलाज्जन्मर्क्षपर्यन्तं गणयेदष्टभिर्भजेत् |
शेषाद्दशाधीपा ज्न्' एया अष्टौ रव्यादयः क्रमात् ||३७||
बृहत्पाराशरहोराशास्त्रम् 46.38
नव वर्षाणि सर्वेषां विकेतूनां नभःसदाम् |
लग्नेशे सप्तमे यस्य लग्ने वा सप्तमाधिपे ||३८||
बृहत्पाराशरहोराशास्त्रम् 46.39
चिन्तनीया दशा तस्य द्विसप्ततिसमाह्वया |
विंशोत्तरीवदत्राऽपि भुक्तं भोग्यं च साधयेत् ||३९||
बृहत्पाराशरहोराशास्त्रम् 46.40
यदार्को लग्नराशिस्थश्चिन्त्या षष्टिसमा तदा |
दास्रात् त्रयं चतुष्कं च त्रयं चेति पुनः पुनः ||४०||
बृहत्पाराशरहोराशास्त्रम् 46.41
गुर्वर्कभूसुतानां च दशा दश दशाब्दकाः |
ततः शशिज्ञशुक्रार्कपुत्रागूनां रसाब्दकाः ||४१||
बृहत्पाराशरहोराशास्त्रम् 46.42
श्रवणाज्जन्मभं यावत् संख्या वसुविभाजिता |
शेषे चन्द्ररवीज्यारबुधार्किभृगुराहवः ||४२||
बृहत्पाराशरहोराशास्त्रम् 46.43
क्रमाद्दशाधिपास्तेषामेकाद्येकोत्तराः समा |
लग्ने दिनेऽर्कहोरायां चन्द्रहोरागते निशि ||४३||
बृहत्पाराशरहोराशास्त्रम् 46.44
सूर्यस्याऽर्धास्तयः पूर्वं परस्तादूदयादपि |
पञ्च पञ्च घटी सन्ध्या दशनाडी प्रकीर्तिता ||४४||
बृहत्पाराशरहोराशास्त्रम् 46.45
सन्ध्याद्वयञ्च विंशत्या नाडिकाभिः प्रकीर्तितम् |
दिनस्य विंशतिर्घट्यः पूर्णसंज्ञा उदाहृताः ||४५||
बृहत्पाराशरहोराशास्त्रम् 46.47
अस्तकाले च या सन्ध्या सुधाख्या दशनाडिका |
पूर्णमुग्धघटीमाने द्विगुणे तिथिभिर्भजेत् ||४७||
बृहत्पाराशरहोराशास्त्रम् 46.48
तथा खण्डसुधाघट्यौ चतुर्घ्ने तिथिभिर्भजेत् |
लब्धं वर्षादिकं मानं सूर्यादीनां खचारिणाम् ||४८||
बृहत्पाराशरहोराशास्त्रम् 46.49
एकादिसंख्यया निघ्नं दशामानं पृथक् क्रमात् |
राहुकेतुयुतानां च नवानां कालसंज्ञकम् ||४९||
बृहत्पाराशरहोराशास्त्रम् 46.50
रात्रौ लग्नाश्रिताद्राशेर्दिने लग्नेश्वराश्रिताम् |
सन्ध्यायां वित्तभावस्थान्नेया चक्रदशा बुधैः ||५०||
बृहत्पाराशरहोराशास्त्रम् 46.51
दशा वर्षाणि राशीनामेकैकस्य दशामितिः |
क्रमाच्चक्रस्थितानाञ्च विज्ञातव्या द्विजोत्तम ||५१||
बृहत्पाराशरहोराशास्त्रम् 46.52
अथाऽहं शङ्करं नत्वा कालचक्रदशां ब्रुवे |
पार्वत्यै कथिता पूर्वं सादरं या पिनाकिना ||५२||
बृहत्पाराशरहोराशास्त्रम् 46.53
तस्याः सारं समुद्धृत्य तवाग्रे द्विजमन्दन |
शुभाऽशुभं मनुष्याणां यथा जानन्ति पण्डिताः ||५३||
बृहत्पाराशरहोराशास्त्रम् 46.54
द्वादशारं लिखेच्चक्रं तिर्यगूर्घ्वसमानकम् |
गृहा द्वादश जायन्ते सव्येऽसव्ये द्विधा द्विज ||५४||
बृहत्पाराशरहोराशास्त्रम् 46.55
द्वितीयादिषु कोष्ठेषु राशीन् मेषादिकान् लिखेत् |
एवं द्वादशराश्याख्यं कालचक्रमुदीरितम् ||५५||
बृहत्पाराशरहोराशास्त्रम् 46.56
अश्विन्यादित्रयं सव्यमार्गे चक्रे व्यवस्थितम् |
रोहिण्यादित्रयं चैवमपसव्ये व्यविस्थितम् ||५६||
बृहत्पाराशरहोराशास्त्रम् 46.57
एवमृक्षविभागं हि कृत्वा चक्रं समुद्धरेत् |
अश्विन्यदितिहस्तक्षेमूलप्रोष्ठपदाभिधाः ||५७||
बृहत्पाराशरहोराशास्त्रम् 46.58
वह्निवातादिविश्वर्क्षरेवत्यः सव्यतारकाः |
एतद्दशोषुपादानामश्विन्यादौ च वीक्षयेत् ||५८||
बृहत्पाराशरहोराशास्त्रम् 46.59
देहजीवौ कथं वीक्ष्यौ नक्षत्राणां पदेषु च |
विशदं तत्प्रकारं च मैत्रेय कथयामयहम् ||५९||
बृहत्पाराशरहोराशास्त्रम् 46.60
देहजीवौ मेषचापौ दास्राद्यचरणस्य च |
मेषाद्याश्चापपर्यन्तं राशिपाश्च दशाधिपाः ||६०||
बृहत्पाराशरहोराशास्त्रम् 46.61
मृगयुग्मे देहजीवौ द्वितीयचरणे स्मृतौ |
क्रमात् मिथुनपर्यन्तं राशिपाश्च दशाधिपाः ||६१||
बृहत्पाराशरहोराशास्त्रम् 46.62
दास्रादिदशताराणां तृतीयचरणे द्विज |
गौर्देहो मिथुनं जीवो द्व्येकार्केशदशाङ्कपाः ||६२||
बृहत्पाराशरहोराशास्त्रम् 46.63
क्वक्षिरामर्क्षनाथाश्च दशाधिपतयः क्रमात् |
अश्विन्यादिदशौडूनां चतुर्थचरणे तथा ||६३||
बृहत्पाराशरहोराशास्त्रम् 46.64
कर्कमीनौ देहजीवौ कर्कादिनवराशिपाः |
दशाधीशाश्च विज्ञेया नवैते द्विजसत्तम ||६४||
बृहत्पाराशरहोराशास्त्रम् 46.65
यमेज्यचित्रातोयर्क्षाऽहीर्बुध्न्याः सव्यतारकाः |
एतत्पञ्चोडुपादानां भरण्यादौ विचिन्तयेत् ||६५||
बृहत्पाराशरहोराशास्त्रम् 46.66
याम्यप्रथमपादस्य देहजीवावलिर्झषः |
नागागर्तुपयोधीषुरामाक्षीन्द्वर्कभेश्वराः ||६६||
बृहत्पाराशरहोराशास्त्रम् 46.67
याम्यद्वितीयपादस्य देहजीवौ घटाङ्गने |
रुद्रदिङ्नन्दचन्द्राक्षिरामाब्धीष्वङ्गभेश्वराः ||६७||
बृहत्पाराशरहोराशास्त्रम् 46.68
याम्यतृतीयपादस्य देहजीवौ तुलाङ्गने |
सप्ताष्टाङ्कदिगीशार्कगजाद्रिरमभेश्वराः ||६८||
बृहत्पाराशरहोराशास्त्रम् 46.69
कर्को देहो धनुर्जीवो याम्यतुर्यपदे द्विज |
वेदबाणाग्निनेत्रेन्दुसूर्येशाशाङ्कभेश्वराः ||६९||
बृहत्पाराशरहोराशास्त्रम् 46.70
सप्तमेवं विजानीयादसव्यं कथयाम्यहम् |
द्वादशारां लिखेच्चकं पूर्ववद् द्विजसत्तम ||७०||
बृहत्पाराशरहोराशास्त्रम् 46.71
द्वितीयादिषु कोष्ठेषु वृश्चिकाद् व्यस्तमालिखेएत् |
रोहिणी च मघा द्वीशः कर्णश्चेति चतुष्टयम् ||७१||
बृहत्पाराशरहोराशास्त्रम् 46.72
उक्तं चाऽसव्यनाक्षत्रं पूर्वाचार्यैर्द्विजोत्तम |
एतद्वेदोडुपादानां रोहिनीवन्निरीक्षयेत् ||७२||
बृहत्पाराशरहोराशास्त्रम् 46.73
रोहिण्यादिपदे देहजीवौ कर्किधनुर्धरौ |
नवदिग्रुद्रसूर्येन्दुनेत्राग्नोष्वब्धिभेश्वराः ||७३||
बृहत्पाराशरहोराशास्त्रम् 46.74
धातृद्वितीचरणे देहजीवौ तुलस्त्रियौ |
अङ्कागवसुसूर्येशदिगङ्कवसुजूकपाः ||७४||
बृहत्पाराशरहोराशास्त्रम् 46.75
तृतीयचरणे ब्राह्म देएहजीवौ घटाङ्गने |
षड्बाणब्धिगुणक्षीन्दुनन्ददिग्रुद्रभेश्वराः ||७५||
बृहत्पाराशरहोराशास्त्रम् 46.76
रोहिण्यन्तपदे देहजीवावलिजषौ स्मृतौ |
सूर्येन्दुद्विगुणेष्वब्धितर्कशैलाष्टभेश्वराः ||७६||
बृहत्पाराशरहोराशास्त्रम् 46.77
चान्द्ररौद्रभगार्यम्णमित्रेन्दुवसुवारुणम् |
एतत्ताराष्टकं विज्ञैर्विज्ञेयं चान्द्रवत् क्रमात् ||७७||
बृहत्पाराशरहोराशास्त्रम् 46.78
कर्को देहो झषो जीवो मृगाद्यचरणे द्विज |
व्यस्तान्मीनादिकर्कान्तराशिपाश्च दशाधिपाः ||७८||
बृहत्पाराशरहोराशास्त्रम् 46.79
गौर्देहो मिथुनं जीवो द्वितीयचरणे मृगे |
त्रिद्व्येकाङ्कदिशीशार्कचन्द्राक्षिभवनाधिपाः ||७९||
बृहत्पाराशरहोराशास्त्रम् 46.80
देहजीवौ नक्रयुग्मे तृतीयचरणे मृगे |
त्रिबाणाब्धिरसागाष्टसूर्येशदशभेश्वराः ||८०||
बृहत्पाराशरहोराशास्त्रम् 46.81
मेषो देहो धनुर्जीवो चतुर्थचरणे मृगे |
व्यस्ताच्चापादिमेषान्तराशिपाश्च दशाधिपाः ||८१||
बृहत्पाराशरहोराशास्त्रम् 46.82
अपसव्यगणे त्वेवं देहजीवदशादिकम् |
पार्वत्यै शम्भुना प्रोक्तमिदावींकथितं मया ||८२||
बृहत्पाराशरहोराशास्त्रम् 46.83
केषां च कति वर्षाणि दशेशानां महामुने |
दशाया भुक्तभोग्याद्यं तदारम्भ प्रचक्ष्व मे ||८३||
बृहत्पाराशरहोराशास्त्रम् 46.84
भूतैकविंशगिरयो नवदिक्षोडशाब्धयः |
सूर्यादीनां दशाब्धाः स्यू राशीनां स्वामिनो वशात् ||८४||
बृहत्पाराशरहोराशास्त्रम् 46.85
नरस्य जन्मकाले वा प्रश्नकाले यदंशकः |
तदादिनवराशिनामब्दास्तस्यायुरुच्यते ||८५||
बृहत्पाराशरहोराशास्त्रम् 46.86
सम्पूर्णायुर्भवेदादावर्धमंशस्य मध्यके |
अंशान्ते परमं कष्टमित्याहुरपरे बुधाः ||८६||
बृहत्पाराशरहोराशास्त्रम् 46.87
ज्ञात्वैवं स्फुटसिद्धान्तं राश्यंशं गणयेद् बुधः |
अनुपातेन वक्ष्यामि तदुपायमतः परम् ||८७||
बृहत्पाराशरहोराशास्त्रम् 46.88
गततारास्त्रिभिर्भक्ताः शेषं चैव चतुर्गुणम् |
वर्तमानपदेनाढ्यं राशीनामंशको भवेत् ||८८||
बृहत्पाराशरहोराशास्त्रम् 46.89
मेषे शतं वृषेऽक्षाष्टौ मिथुने त्रिगजाः समाः |
कर्कटेऽङ्गगजाः प्रोक्तास्तावन्तस्तत्त्रिकोणयोः ||८९||
बृहत्पाराशरहोराशास्त्रम् 46.90
जनो यत्रांशके जातो गतनाडीपलादिभिः |
तदांशस्य हताः स्वाब्दाः पञ्चभूमिविभाजिताः ||९०||
बृहत्पाराशरहोराशास्त्रम् 46.91
एवं महादशारम्भो भवेदंशाद्यथा क्रमात् |
गणयेन्नवपर्यन्तं तत्तदायुः प्रकीर्तितम् ||९१||
बृहत्पाराशरहोराशास्त्रम् 46.92
पदस्य भुक्तघट्याद्यैः स्वाब्दमानं हतं ततः |
भभोगांघ्रिहृतं भुक्तं भोग्यं मानाद् विशोधितम् ||९२||
बृहत्पाराशरहोराशास्त्रम् 46.93
चन्द्राङ्कांशकला भुक्ताः स्वाब्दमानहता हृताः |
द्विशत्या भुक्तवर्षाद्यं ज्ञेयं भोग्यं ततो बुधैः ||९३||
बृहत्पाराशरहोराशास्त्रम् 46.94
सव्याख्ये प्रथमांशो यः स देह इति कथ्यते |
अन्त्यांशो जीवसंज्ञः स्याद् विलोममपसव्यके ||९४||
बृहत्पाराशरहोराशास्त्रम् 46.95
देहादिं गणयेत् सव्ये जीवादिमपसव्यके |
एवं विज्ञाय दैवज्ञस्ततस्तत्फलमादिशेत् ||९५||
बृहत्पाराशरहोराशास्त्रम् 46.96
कालचक्रगतिः प्रोक्ता त्रिधा पूर्वमहर्षिभिः |
मण्डूकाख्या गतिश्चैका मर्कटीसंज्ञकाऽपरा ||९६||
बृहत्पाराशरहोराशास्त्रम् 46.97
सिंहावलोकनाख्या च तृतीया परिकीर्तिता |
उत्प्लुत्य गमनं विज्ञा मण्डूकाख्यं प्रचक्षते ||९७||
बृहत्पाराशरहोराशास्त्रम् 46.98
पृष्ठतो गमनं नाम मर्कटीसंज्ञकं तथा |
वाणाच्च नवपर्यन्तं गतिः सिंहावलोकनम् ||९८||
बृहत्पाराशरहोराशास्त्रम् 46.99
कन्याकर्कटयोः सिंहयुग्मयोर्मण्डूय्की गतिः |
कर्ककेसरिणोरेवं कथ्यते मर्कटीं गतिः ||९९||
बृहत्पाराशरहोराशास्त्रम् 46.100
मीनवृश्चिकयोश्चापमेषयोः सैंहिकी गतिः |
इति सञ्चिन्त्य विज्ञेयं कालचक्रदशाफलम् ||१००||
बृहत्पाराशरहोराशास्त्रम् 46.101
मण्डूकगतिकाले हि सव्ये बन्धुजने भयम् |
पित्रोर्वा विषशस्त्राग्निज्वरचोरादिजं भयम् ||१०१||
बृहत्पाराशरहोराशास्त्रम् 46.102
केसरीयुग्ममण्डूके मातुर्मरण्मादिशेत् |
स्वमृतिं राजभितिं वा सन्निपातभयं भवेत् ||१०२||
बृहत्पाराशरहोराशास्त्रम् 46.103
मर्कटीगमने सव्ये धनधान्यपशुक्षयः |
पितुर्मरणमालस्यं तत्समानां च व मृतिः ||१०३||
बृहत्पाराशरहोराशास्त्रम् 46.104
सव्ये सिंहावलोके तु पशुभीतिर्भवेन्नृणाम् |
सुहृत्स्नेहादिनाशश्च समानजनपीडनम् ||१०४||
बृहत्पाराशरहोराशास्त्रम् 46.105
पतनं वापि कूपादौ विषशस्र्ताग्निजं भयम् |
वाहनात् पतनं वापि ज्वरार्तिः स्थाननाशनम् ||१०५||
बृहत्पाराशरहोराशास्त्रम् 46.106
मण्डूकगमने वामे स्त्रीसुतादिप्रपीडनम् |
ज्वरं च श्वापदाद् भीतिं वदेद् विज्ञः पदच्युतिम् ||१०६||
बृहत्पाराशरहोराशास्त्रम् 46.107
मर्कटीगमने वाऽपि जलभीतिं पदच्युतिम् |
पितुर्नाशं नृपक्रोधं दुर्गारण्याटनं वदेत् ||१०७||
बृहत्पाराशरहोराशास्त्रम् 46.108
सिंहावलोकने वामे पदभ्रंशः पितुर्मृतिः |
तत्समानमृतिर्वाऽपि फलमेवं विचिन्तयेत् ||१०८||
बृहत्पाराशरहोराशास्त्रम् 46.109
मीनात् तु वृश्चिके याते ज्वरो भवति निश्चितः |
कन्यातः कर्कटे याते भ्रातृबन्धुविनाशनम् ||१०९||
बृहत्पाराशरहोराशास्त्रम् 46.110
सिंहात्तु मिथुने याते स्त्रिया व्याधिर्भवेद् ध्रुवम् |
कर्कटाच्च हरौ याते वधो भवति देहिनाम् ||११०||
बृहत्पाराशरहोराशास्त्रम् 46.111
पितृबन्धुमृतिं विद्याच्चापान्मेषे गते पुनः |
भयं पापखगैर्युक्ते शुभखेटयुते शुभम् ||१११||
बृहत्पाराशरहोराशास्त्रम् 46.112
शुभं वाऽप्यशुभं वाऽपि कालचक्रदशाफलम् |
राशिदिक्भागतो वापि पूर्वादिदिग्तभश्चरात् ||११२||
बृहत्पाराशरहोराशास्त्रम् 46.113
तद्दिगावभागे वक्तव्यं तद्दशासमये नृणाम् |
यथोपदेशमार्गेण सर्वेषां द्विजसत्तम ||११३||
बृहत्पाराशरहोराशास्त्रम् 46.114
कन्यातः कर्कटे याते पूर्वभागे महत्फलम् |
उत्तरं देशमाश्रित्य शुभा यात्रा भविष्यति ||११४||
बृहत्पाराशरहोराशास्त्रम् 46.115
सिंहात्तु मिथुने याते पूर्वभागं विवर्जयेत् |
कार्यान्तेऽपि च नैऋत्यां सुखं यात्रा भविष्यति ||११५||
बृहत्पाराशरहोराशास्त्रम् 46.116
कर्कटात् सिंहभे याते कार्यहानिश्च दक्षिणे |
दक्षिणां दिशमाश्रित्य प्रत्यगागमनं भवेत् ||११६||
बृहत्पाराशरहोराशास्त्रम् 46.117
मीनात्तु वृश्चिके याते उदग् गच्छति सङ्कटम् |
चापाच्च मकरे याते सङ्कटं जायते ध्रुवम् ||११७||
बृहत्पाराशरहोराशास्त्रम् 46.118
चापान्मेषे तु यात्रायां व्याधिर्बन्धो मृतिर्भवेत् |
वृश्चिके तु सुखं सम्पत् स्त्रीप्राप्तिश्च द्विजोत्तम ||११८||
बृहत्पाराशरहोराशास्त्रम् 46.119
सिंहाच्च कर्कटे याते पस्चिमां वर्जयेद्दिशम् |
शुभयोगे शुभं ब्रूयादशुभे त्वशुभं फलम् ||११९||
बृहत्पाराशरहोराशास्त्रम् 46.120
शूरश्चौरश्च मेषांशे लक्ष्मीवांश्च वृषांशके |
मिथुनांशे भवेज्ज्ञानी कर्कांशे नृपतिर्भवेत् ||१२०||
बृहत्पाराशरहोराशास्त्रम् 46.121
सिंहांशे राजमान्यश्च कन्यांशे पण्डितो भवेत् |
तुलांशे राजमन्त्री स्याद् वृश्चिकांशे च निर्धनः ||१२१||
बृहत्पाराशरहोराशास्त्रम् 46.122
चापांशे ज्ञानसम्पन्नो मरकांशे च पापकृत् |
कुम्भांशे च वणिक्कर्मा मीनांशे धनधान्यवान् ||१२२||
बृहत्पाराशरहोराशास्त्रम् 46.123
देहो जीवोऽथवा युक्तो रविभौमार्किराहुभिः |
एकैकयोगे मृत्युः स्याद् बहुयोगे तु का कथा ||१२३||
बृहत्पाराशरहोराशास्त्रम् 46.124
क्रूरैर्युक्ते तनौ रोगं जीवे युक्ते महद् भयम् |
आधी रोगो भवेद् द्वाभ्या.मपमृत्युस्र्तिभिर्भवेत् ||१२४||
बृहत्पाराशरहोराशास्त्रम् 46.125
चतुर्भिर्मृतिमापन्नो देहे जीवेऽशुभैर्युते |
युगपद्देहजीवौ च क्रूरग्रहयुतौ तदा ||१२५||
बृहत्पाराशरहोराशास्त्रम् 46.126
राजचोरादिभीतिश्च मृतिश्चापि न संशयः |
वह्निवाधा रवौ ज्ञेया क्षीणेन्दौ च जलाद् भयम् ||१२६||
बृहत्पाराशरहोराशास्त्रम् 46.127
कुजे शस्त्रकृता पीडा वायुवाधा बुधे भवेत् |
गुल्मवाधा शनौ ज्ञेया राहौ केतौ विषाद् भयम् ||१२७||
बृहत्पाराशरहोराशास्त्रम् 46.128
देहजीवगृहे यातो बुधो जीवोऽथवा भृगुः |
सुखस्म्पत्कराः सर्वे रोगशोकविनाशनाः ||१२८||
बृहत्पाराशरहोराशास्त्रम् 46.129
मिश्रगृहैश्च संयुक्ते मिश्रं फलमवाप्नुयात् |
पापक्षेत्रदशाकाले देहजीवौ तु दुःखितौ |
शुभक्षेत्रदशाकाले शुभं भवति निश्चितम् ||१२९||
बृहत्पाराशरहोराशास्त्रम् 46.130
शुभयुक्ताशुभक्षेत्रदशा मिश्रफला स्मृता |
क्रूरयुक्तशुभक्षेत्रदशा मिश्रफला तथा ||१३०||
बृहत्पाराशरहोराशास्त्रम् 46.131
जनानां जन्मकाले तु यो राशिस्तनुभावगः |
तस्य चक्रदशाकाले देहारोग्यं सुखं महत् ||१३१||
बृहत्पाराशरहोराशास्त्रम् 46.132
शुभे पूर्णसुखं पापे देहे रोगादिसम्भवः |
स्वोच्चादिगतखेटाढ्ये राज्यमानधनाप्तयः ||१३२||
बृहत्पाराशरहोराशास्त्रम् 46.133
धनभावे च यो राशिस्तस्य चक्रदशा यदा |
तदा सुभोजन.म् पुत्रस्त्रिसुखं च धनाप्तयः ||१३३||
बृहत्पाराशरहोराशास्त्रम् 46.134
विद्याप्तिर्वाक्पटुत्वं च सुगोष्ठ्या कालयापनम् |
शुभर्क्षे फलमेवं स्यात् पापभे फलमन्यथा ||१३४||
बृहत्पाराशरहोराशास्त्रम् 46.135
तृतीयभावराशेस्तु कालचक्रदशा यदा |
तदा भ्रातृसुखं शौर्यं धैर्यं चापि महत्सुखम् ||१३५||
बृहत्पाराशरहोराशास्त्रम् 46.136
स्वर्णाभरणवस्त्राप्तिः सम्मानं राजसंसदि |
शुभर्क्षे फलमेवं स्यात् पापर्क्षे फलमन्यथा ||१३६||
बृहत्पाराशरहोराशास्त्रम् 46.137
सुखभावगतर्क्षस्य कालचक्रदशा यदा |
तदा बन्धुसुखं भूमिगृहराज्यसुखाप्तयः ||१३७||
बृहत्पाराशरहोराशास्त्रम् 46.138
आरोग्यमर्थलाभश्च वस्त्रवाहनजं सुखम् |
शुभर्क्षे शोभनं ज्ञेयं पापभे फलमन्यथा ||१३८||
बृहत्पाराशरहोराशास्त्रम् 46.139
सुतभावगतर्क्षस्य कालचक्रदशा यदा |
सुतस्त्रीराज्यसौख्याप्तिरारोग्यं मित्रसंगमः ||१३९||
बृहत्पाराशरहोराशास्त्रम् 46.140
विद्याबुद्धियशोलाभो धैर्यं च विक्रमोदयः |
शुभराशौ शुभं पूर्णं पापर्क्षे फलमन्यथा ||१४०||
बृहत्पाराशरहोराशास्त्रम् 46.141
रिपुभावगतर्क्षस्य कालचक्रदशा यदा |
तदा चोरादिभूपाग्निविषशस्त्रभयं महत् ||१४१||
बृहत्पाराशरहोराशास्त्रम् 46.142
प्रमेहगुल्मपण्ड्वादिरोगाणामपि संभवः |
पापर्क्षे फलमेवं स्यात् शुभर्क्षे मिश्रमादिशेत् ||१४२||
बृहत्पाराशरहोराशास्त्रम् 46.143
जायाभावगतर्क्षस्य कालचक्रदशा यदा |
तदा पाणिग्रहः पत्नीपुत्रलाभादिकं सुखम् ||१४३||
बृहत्पाराशरहोराशास्त्रम् 46.144
कृषियोधनवस्त्राप्तिर्नृपपूजा महद्यशः |
शुभराशौ फलं पूर्णं पापराशौ च तद्दलम् ||१४४||
बृहत्पाराशरहोराशास्त्रम् 46.145
मृत्युभावस्थितर्क्षस्य कालचक्रदशा तदा |
स्थाननाशं महद् दुःखं बन्धुनाशं धनक्षयम् ||१४५||
बृहत्पाराशरहोराशास्त्रम् 46.146
दारिद्र्यमन्नविद्वोपमरिभीतिं च निर्दिशेत् |
पापराशौ फलं पूर्णं शुभराशौ च तद्दलम् ||१४६||
बृहत्पाराशरहोराशास्त्रम् 46.147
धर्मभावगतर्क्षस्य कालचक्रदशा यदा |
तदा पुत्रकलत्रार्थकृषिगेहसुखं वदेत् ||१४७||
बृहत्पाराशरहोराशास्त्रम् 46.148
सत्कर्मधर्मसंसिद्धिं महज्जनपरिग्रहम् |
शुभराशौ शुभं पूर्णं पापराशौ च तद्दलम् ||१४८||
बृहत्पाराशरहोराशास्त्रम् 46.149
कर्मभावगतर्क्षस्य कालचक्रदशा यदा |
राज्याप्तिर्भूपसम्मानं पुत्रदारादिजं सुखम् ||१४९||
बृहत्पाराशरहोराशास्त्रम् 46.150
सत्कर्मफलमैश्वर्यं सद्गोष्ठ्या कालयापनम् |
शुभराशौ फलं पूर्णं पापराशौ च मिश्रितम् ||१५०||
बृहत्पाराशरहोराशास्त्रम् 46.151
लाभभावस्थितर्क्षस्य कालचक्रदशा यदा |
पुत्रस्त्रीबन्धुसौख्याप्तिर्भूपप्रीतिर्महत्सुखम् ||१५१||
बृहत्पाराशरहोराशास्त्रम् 46.152
धनवस्त्राप्तिरारोग्यं सतां सङ्गश्च जायते |
शुभराशौ फलं पूर्णं पापराशौ च खण्डितम् ||१५२||
बृहत्पाराशरहोराशास्त्रम् 46.153
व्ययभावगतर्क्षस्य कालचक्रदशा तदा |
उद्योगभङ्गमालस्यं देहपीडां पदच्युतिम् ||१५३||
बृहत्पाराशरहोराशास्त्रम् 46.154
दारिद्यं कर्मवैफल्यं तथा व्यर्थव्ययं वदेत् |
पापराशौ फलं त्वेवं शुभराशौ च तद्दलम् ||१५४||
बृहत्पाराशरहोराशास्त्रम् 46.155
लग्नादिव्ययपर्यन्तं भानां चरदशां ब्रुवे |
तस्मात् तदीशपर्यन्तं संख्यामत्र दशां विदुः ||१५५||
बृहत्पाराशरहोराशास्त्रम् 46.156
मेषादित्रित्रिभैर्ज्ञेयं पदमोजपदे क्रमात् |
दशाब्दानयने कार्या गणना व्युत्क्रमात् समे ||१५६||
बृहत्पाराशरहोराशास्त्रम् 46.157
वृश्चिकाधिपती द्वौ च केतुभौमौ स्मृतौ द्विज |
शनिराहु च कुम्भस्य स्वामिनौ परिकीर्तितो ||१५७||
बृहत्पाराशरहोराशास्त्रम् 46.158
द्विनाथक्षेत्रयोरत्र क्रियते निर्णयोऽधुना |
द्वावेवाधिपती विप्र युक्तौ स्वर्क्षे स्थितौ यदि ||१५८||
बृहत्पाराशरहोराशास्त्रम् 46.159
वर्ष द्वादशकं तत्र न चेदेकादि चिन्तयेत् |
एकः स्वक्षेत्रयोऽन्यस्तु परत्र यदि संस्थितः ||१५९||
बृहत्पाराशरहोराशास्त्रम् 46.160
तदाऽन्यत्र स्थितं नाथं परिगृह्य दशां नयेत् |
द्वावप्यन्यर्क्षगौ तौ चेत् तमोर्मध्ये च यो बली ||१६०||
बृहत्पाराशरहोराशास्त्रम् 46.161
तत एव दशा ग्राह्या क्रमाद् वोत्क्रमतो द्विजः |
बलस्याऽत्र विचारे स्यादग्रहात् सग्रहो बली ||१६१||
बृहत्पाराशरहोराशास्त्रम् 46.162
द्वावेव सग्रहौ तौ चेत् बली तत्राधिकग्रहः |
ग्रहयोगसमानत्वे ज्ञेयं राशिबलाद् बलम् ||१६२||
बृहत्पाराशरहोराशास्त्रम् 46.163
ज्ञेयाश्चरस्थिरद्वन्द्वाः क्रमतो बलशालिनः |
राशिसत्त्वसमानत्वे बहुवर्षो बली भवेद् ||१६३||
बृहत्पाराशरहोराशास्त्रम् 46.164
एकः स्वोच्चगतश्चाऽन्यः परत्र यदि संस्थितः |
गृह्णीयादुच्चखेटस्थं राशिमन्यं विहाय वै ||१६४||
बृहत्पाराशरहोराशास्त्रम् 46.165
उच्चखेटस्य सद्भावे वर्षमेकं च निक्षिपेत् |
तथैव नीचखेटस्य वर्षमेकं विशोधयेत् ||१६५||
बृहत्पाराशरहोराशास्त्रम् 46.166
एवं सर्वं समालोच्य जातकस्य फलं वदेत् ||१६६||
बृहत्पाराशरहोराशास्त्रम् 46.167
क्रमादुत्क्रमतो वाऽपि धर्मभावपदक्रमात् |
लग्नराशिं समारभ्य विज्ञश्चरदशां नयेत् ||१६७||
बृहत्पाराशरहोराशास्त्रम् 46.168
अथाऽहं संप्रवक्ष्यामि स्थिरसंज्ञां दशां द्विज |
चरे सप्त स्थिरे चाऽष्टौ द्वन्द्वे नव समाः स्मृताः ||१६८||
बृहत्पाराशरहोराशास्त्रम् 46.169
स्थिरत्वाच्च दशाब्दानां स्थिराख्येति निगद्यते |
ब्रह्मखेटाश्रितर्क्षादिर्दशेयं परिवर्तते ||१६९||
बृहत्पाराशरहोराशास्त्रम् 46.170
योऽसौ ब्रह्मग्रहः प्रोक्तः कथं स ज्ञायते मुने |
इति स्पष्टतरं ब्रूहि कृपाऽस्ति यदि ते मयि ||१७०||
बृहत्पाराशरहोराशास्त्रम् 46.171
षष्ठाष्टव्ययनाथेषु यो बली विषमर्क्षगः |
पृष्ठस्थितो भवेद् ब्रह्मां बलिनो लग्नजाययोः ||१७१||
बृहत्पाराशरहोराशास्त्रम् 46.172
कारकादष्टमेशो वा ब्रह्माऽप्यष्टभावगः |
शनौ पाते च ब्रह्मत्त्वे ब्रह्मा तत्षष्ठखेचरः ||१७२||
बृहत्पाराशरहोराशास्त्रम् 46.173
बहवो लक्षणक्रान्ता ज्ञेयस्तेष्वधिकांशकः |
अंशसाम्ये बलाधिक्याद् विज्ञेयो ब्रह्मखेचरः ||१७३||
बृहत्पाराशरहोराशास्त्रम् 46.174
योगार्धे च दशामानं द्वयोर्योगार्धसम्मितम् |
लग्नसप्तमप्राण्यादिर्दशेयं च प्रवर्तते ||१७४||
बृहत्पाराशरहोराशास्त्रम् 46.175
लग्नसप्तमयोर्मध्ये यो राशिर्बलवान् भवेत् |
ततः केन्द्रादिसंस्थानां राशीनाञ्च बलक्रमात् ||१७५||
बृहत्पाराशरहोराशास्त्रम् 46.176
कारकादपि राशीनां खेटानां चैवमेव हि |
दशाब्दाश्चरवज्ज्ञेयाः खेटानां च स्वभावधि ||१७६||
बृहत्पाराशरहोराशास्त्रम् 46.177
द्विराश्यधिपक्षेटस्य गण्येदुभयावधि |
उभयोर्धिक संख्या कारकस्य दशा समाः ||१७७||
बृहत्पाराशरहोराशास्त्रम् 46.178
आत्मकारकमारभ्य कारकाख्यदशा क्रमात् |
लग्नात् कारकपर्यन्तं संख्यामत्र दशां विदुः ||१७८||
बृहत्पाराशरहोराशास्त्रम् 46.179
मण्डूकापरपर्याया त्रिकूटाख्यदशा द्विज |
लग्नसप्तमयोर्मध्ये यो राशिर्बलवान् भवेत् ||१७९||
बृहत्पाराशरहोराशास्त्रम् 46.180
ततः क्रमेणौजराशौ समे नेया तथोऽत्क्रमात् |
त्रिकूटानां च विज्ञेयाः स्थिरवच्च दशा समाः ||१८०||
बृहत्पाराशरहोराशास्त्रम् 46.181
निर्याणस्य विचारार्थं कैश्चिछूलदशा स्मृता |
लग्नसप्तमतो मृत्युभयोर्यो बलवान् भवेत् ||१८१||
बृहत्पाराशरहोराशास्त्रम् 46.182
तदादिर्विषमे विप्र क्रमादुत्क्रमतः समे |
दशाब्दाः स्थिरवत्तत्र बलिमारकभे मृतिः ||१८२||
बृहत्पाराशरहोराशास्त्रम् 46.183
जन्मलग्नत्रिकोणेषु यो राशिर्बलवान् भवेत् |
तमार्भ्य नयेद् धीमान् चरिपर्यायवद् दशाम् ||१८३||
बृहत्पाराशरहोराशास्त्रम् 46.184
क्रमादुत्क्रमतो ग्राह्यं त्रिकोणं विषमे समे |
त्रिकोणाख्यदशा प्रोक्ता समा नाथावसानकाः ||१८४||
बृहत्पाराशरहोराशास्त्रम् 46.185
लग्नाद् धर्मस्य तद्दृष्टराशीनां च दशास्ततः |
दशमस्य च तद्दृष्टराशीनां च नयेत् पुनः ||१८५||
बृहत्पाराशरहोराशास्त्रम् 46.186
एकादशस्य तद्दृष्टराशीनां स्थिरवत् समाः |
प्रवृत्ता दृग् वशाद्यस्माद् दृग्दशेयं ततः स्मृता ||१८६||
बृहत्पाराशरहोराशास्त्रम् 46.187
चरे व्युत्क्रमतो ग्राह्या दृग्योग्याः स्थिरभे क्रमात् |
विषमे क्रमतो द्वन्द्वे राशयो व्युत्क्रमात् समे ||१८७||
बृहत्पाराशरहोराशास्त्रम् 46.188
ऋक्षे लग्नादिराशीनां दशा राशिदशा स्मृता |
भयातं रविभिर्निघ्नं भभोगविहृतं फलम् ||१८८||
बृहत्पाराशरहोराशास्त्रम् 46.189
राश्याद्यं लग्नराश्यादौ योज्यं द्वादशशेषितम् |
तदारभ्य क्रमादोजे दशा ज्ञेयोत्क्रमात् समे ||१८९||
बृहत्पाराशरहोराशास्त्रम् 46.190
दशाब्दा भुक्तभागघ्ना त्रिंशता विहृताह् फलम् |
भुक्तं वर्षादिकं ज्ञेयं भोग्यं मानाद् विशोधितम् ||१९०||
बृहत्पाराशरहोराशास्त्रम् 46.191
अकारादीन् स्वरान् पञ्च प्रथमं विन्यसेत् क्रमात् |
कादिहान्तांल्लिखेद् वर्णान् स्वराधो ङञणोज्झितान् ||१९१||
बृहत्पाराशरहोराशास्त्रम् 46.192
तिर्यक् पंक्तिक्रमेणैव पञ्चपञ्चविभागतः |
न प्रोक्ता ङञणा वर्णा नामादौ सन्ति ते नहि ||१९२||
बृहत्पाराशरहोराशास्त्रम् 46.193
चेद् भवन्ति तदा ज्ञेया गजडास्ते यथाक्रमात् |
यत्र स्वरे स्वनामाद्यवर्णः स्यात् तत्स्वरादयः ||१९३||
बृहत्पाराशरहोराशास्त्रम् 46.194
क्रमात् पंच दशाधीशाः द्वादशद्वादशाब्दकाः |
स्वराणां च क्रमाज्ज्ञेयाः दशास्वन्तर्दशादयः ||१९४||
बृहत्पाराशरहोराशास्त्रम् 46.195
पूर्वमेव मया प्रोक्ता वर्णदाख्या दशा द्विज |
इदानीं शम्भुना प्रोक्ता कथ्यते योगिनी दशा ||१९५||
बृहत्पाराशरहोराशास्त्रम् 46.196
मङ्गला पिङ्गला धन्या भ्रामरी भद्रिका तथा |
उल्का सिद्धा संकटा च योगिन्योऽष्टौ प्रकीर्तिताः ||१९६||
बृहत्पाराशरहोराशास्त्रम् 46.197
मङ्गलातोऽभवच्चन्द्रः पिङ्गलातो दिवाकरः |
धन्यातो देवपूज्योऽभूद् भ्रामरीतोऽभवत् कुजः ||१९७||
बृहत्पाराशरहोराशास्त्रम् 46.198
भर्दिकातो बुधो जातस्तथोल्कातः शनैश्चरः |
सिद्धातो भार्गवि जातः संकटातस्तमोऽभवद् ||१९८||
बृहत्पाराशरहोराशास्त्रम् 46.199
जन्मर्क्ष च त्रिभिर्युक्तं वसुभिर्भागमाहरेत् |
एकादिशेषे विज्ञेया योगिन्योः मङ्गलादिकाः ||१९९||
बृहत्पाराशरहोराशास्त्रम् 46.200
एकाद्येकोत्तरा ज्ञेयाः क्रमादासां दशासमाः |
नक्षत्रयातभोगाभ्यां भुक्तं भोग्यं च साधयेत् ||२००||
बृहत्पाराशरहोराशास्त्रम् 46.201
येषां यदायुः संप्रोक्तं पैण्डमांशं निसर्गजम् |
तक्षत् तेषां दशा ज्ञेया पैण्डी चांशी निसर्गजा ||२०१||
बृहत्पाराशरहोराशास्त्रम् 46.202
बली लग्नार्कचन्द्राणां यत्तस्य प्रथमा दशा |
तत्केन्द्रादिगतानां च ज्ञेया बलवशात्ततः ||२०२||
बृहत्पाराशरहोराशास्त्रम् 46.203
अष्टवर्गबलेनैषां फलानि परिचिन्तयेत् |
अष्टवर्गदशाश्चैताः कथिताः पूर्वसूरिभिः ||२०३||
बृहत्पाराशरहोराशास्त्रम् 46.204
परायुर्द्वादशो भागस्तस्य सन्ध्या प्रकीर्तिता |
तन्मिता लग्नभादीनां क्रमात् सन्ध्यादशा स्मृता ||२०४||
बृहत्पाराशरहोराशास्त्रम् 46.205
सन्ध्या रसगुणा कार्या चन्द्रवह्निहृता फलम् |
संस्थाप्यं प्रथमे कोष्ठे तदर्धं त्रिषु विन्यसेत् ||२०५||
बृहत्पाराशरहोराशास्त्रम् 46.206
त्रिभागं वसुकोष्ठेषु विन्यस्य तत्फलं वदेत् |
एवं द्वादशभावेषु पाचकानि प्रकल्पयेत् ||२०६||
बृहत्पाराशरहोराशास्त्रम् 46.207
विंशत्तरिदशेवाऽत्र कैश्चित् तारादशा स्मृता |
आशंकुरागुशबुकेश्वादिस्थानेषु तारकाः ||२०७||
बृहत्पाराशरहोराशास्त्रम् 46.208
अन्मसम्पत्विपत्क्षेमप्रत्यरिः साधको बधः |
मैत्रं परममैत्रं च केन्द्रस्थबलिनो ग्रहात् ||२०८||
बृहत्पाराशरहोराशास्त्रम् 46.209
ज्ञेया तारादशा विप्र नामतुल्यफलप्रदा |
यस्य केन्द्रे स्थितः खेटो दशेयं तस्य कीर्तिता ||२०९||
बृहत्पाराशरहोराशास्त्रम् 46.210
इति ते कथिता विप्र दश भेदा अनेकधा |
एतदन्तर्दशाभेदान् कथयिष्यामि चाग्रतः ||२१०||
बृहत्पाराशरहोराशास्त्रम् 46
-
पाठ का स्रोत और उपयोग अधिकार
संस्कृत विकिस्रोत के योगदानकर्ता · CC BY-SA 4.0 · सुरक्षित प्रति: 2026-10-11
विकिस्रोत से सुरक्षित इलेक्ट्रॉनिक पाठ; मूल मुद्रित संस्करण का OCR नहीं अध्याय और श्लोकों में विभाजन, नेविगेशन हटाया; पाठ की वर्तनी अपरिवर्तित।
अध्याय 46 · स्रोत संस्करण: https://sa.wikisource.org/w/index.php?title=%E0%A4%AC%E0%A5%83%E0%A4%B9%E0%A4%A4%E0%A5%8D%E0%A4%AA%E0%A4%BE%E0%A4%B0%E0%A4%BE%E0%A4%B6%E0%A4%B0%E0%A4%B9%E0%A5%8B%E0%A4%B0%E0%A4%BE%E0%A4%B6%E0%A4%BE%E0%A4%B8%E0%A5%8D%E0%A4%A4%E0%A5%8D%E0%A4%B0%E0%A4%AE%E0%A5%8D/%E0%A4%85%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83_%E0%A5%AA%E0%A5%AC_(%E0%A4%A6%E0%A4%B6%E0%A4%BE%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83)&oldid=85827