बृहत्पाराशरहोराशास्त्रम् 21.1
कर्मभावफलं चाऽथ कथयामि तवाग्रतः।
सृणु मैत्रेय तत्त्वेन ब्रह्मगर्गादिभाषितम्॥ १॥
अध्ययन · संस्कृत · शास्त्रीय संदर्भSTUDY · SANSKRIT · CLASSICAL REFERENCES
बृहत्पाराशरहोराशास्त्रम् · अध्याय 21 · अध्यायः २१ (कर्मभावफलाध्यायः)
97 अध्यायों की सूची; 91 अध्यायों का पाठ उपलब्ध। अध्याय 16, 18, 20, 22, 23 और 35 में स्रोत का गलत दोहराव मिलने से पाठ रोका गया है। यह अभी पूर्ण BPHS नहीं है।
मूल मुद्रित संस्करण से पूर्ण प्रूफरीड शेष है। OCR/टाइपिंग त्रुटियाँ और संस्करणों के पाठभेद संभव हैं। अनुवाद जहाँ उपलब्ध है वहीं दिखता है। मशीन अनुवाद का मसौदा और संपादक द्वारा जाँचा अनुवाद अलग चिह्नित हैं।
बृहत्पाराशरहोराशास्त्रम् 21.2
सबले कर्मभावेशे स्वोच्चे स्वांशे स्वराशिगे।
जातस्तातसुखेनाढ्यो यशस्वी शुभकर्मकृत्॥ २॥
बृहत्पाराशरहोराशास्त्रम् 21.3
कर्माधिपो बलोनश्चेत् कर्मवैकल्यमादिशेत्।
सैहिः केन्द्रत्रिकोणस्थो ज्योतिष्टोमादियागकृत्॥ ३॥
बृहत्पाराशरहोराशास्त्रम् 21.4
कर्मेशे शुभसंयुक्ते शुभस्थानगते तथा।
राजद्वारे च वाणिज्ये सदा लाभोऽन्यथान्यथा॥ ४॥
बृहत्पाराशरहोराशास्त्रम् 21.5
दशमे पापसंयुक्ते लाभे पापसमन्विते।
दुष्कृतिं लभते मर्त्यः स्वजनानां विदूषकः॥ ५॥
बृहत्पाराशरहोराशास्त्रम् 21.6
कर्मेशे नाशराशिस्थे राहुणा संयुते तथा।
जनद्वेषी महामूर्खो दुष्कृतिं लभते नरः॥ ६॥
बृहत्पाराशरहोराशास्त्रम् 21.7
कर्मेशे द्यूनराशिस्थे मन्दभौमसमन्विते।
द्यूनेशे पापसंयुते शिश्नोदरपरायणः॥ ७॥
बृहत्पाराशरहोराशास्त्रम् 21.8
तुङ्गराशिं समाश्रित्य कर्मेशे गुरुसंयुते।
भाग्येशे कर्मराशिस्थे मानैश्वर्यप्रतापवान्॥ ८॥
बृहत्पाराशरहोराशास्त्रम् 21.9
लाभेशे कर्मराशिस्थे कर्मेशे लग्नसंयुते।
तावुभौ केन्द्रगौ वापि सुखजीवनभाग् भवेत्॥ ९॥
बृहत्पाराशरहोराशास्त्रम् 21.10
कर्मेशे बलसंयुक्ते मीने गुरुसमन्विते।
वस्त्राभरणसौख्यादि लभते नात्र संशयः॥ १०॥
बृहत्पाराशरहोराशास्त्रम् 21.11
लाभस्थानगते सूर्ये राहुभौमसमन्विते।
रविपुत्रेण संयुक्ते कर्मच्छेत्ता भवेन्नरः॥ ११॥
बृहत्पाराशरहोराशास्त्रम् 21.12
मीने जीवे भृगुयुते लग्नेशे बलसंयुते।
स्वोच्चराशिगते चन्द्रे सम्यग्ज्ञानार्थवान् भवेत्॥ १२॥
बृहत्पाराशरहोराशास्त्रम् 21.13
केन्द्रेशे लाभराशिस्थे लाभेशे लग्नसंस्थिते।
कर्मराशिस्थिते शुक्रे रत्नवान् स नरो भवेत्॥ १३॥
बृहत्पाराशरहोराशास्त्रम् 21.14
केन्द्रत्रिकोणगे कर्मनाथे स्वोच्चसमाश्रिते।
गुरुणा सहिते दृष्टे स कर्मसहितो भवेत्॥ १४॥
बृहत्पाराशरहोराशास्त्रम् 21.15
कर्मेशे लग्नभावस्थे लग्नेशेन समन्विते।
केन्द्रत्रिकोणगे चन्द्रे सत्कर्मनिरतो भवेत्॥ १५॥
बृहत्पाराशरहोराशास्त्रम् 21.16
कर्मस्थानगते मन्दे नीचखेचरसंयुते।
कर्मांशे पापसंयुक्ते कर्महीनो भवेन्नरः॥ १६॥
बृहत्पाराशरहोराशास्त्रम् 21.17
कर्मेशे नाशराशिस्थे रन्ध्रेशे कर्मसंस्थिते।
पापग्रहेण संयुक्ते दुष्कर्म निरतो भवेत्॥ १७॥
बृहत्पाराशरहोराशास्त्रम् 21.18
कर्मेशे नीचराशिस्थे कर्मस्थे पापखेचरे।
कर्मभात्कर्मगे पापे कर्मवैकल्यमादिशेत्॥ १८॥
बृहत्पाराशरहोराशास्त्रम् 21.19
कर्मस्थानगते चन्द्रे तदीशे तत्त्रिकोणगे।
लग्नेशे केन्द्रभावस्थे सत्कीर्तिसहितो भवेत्॥ १९॥
बृहत्पाराशरहोराशास्त्रम् 21.20
लाभेशे कर्मभावस्थे कर्मेशे बलसंयुक्ते।
देवेन्द्रगुरुणा दृष्टे सत्कीर्तिसहितो भवेत्॥ २०॥
बृहत्पाराशरहोराशास्त्रम् 21.21
कर्मस्थानाधिपे भाग्ये लग्नेशे कर्मसंयुते।
लग्नात् पञ्चमगे चन्द्रे ख्यातनामा नरो भवेत्॥ २१॥
बृहत्पाराशरहोराशास्त्रम् 21.22
इति कर्मफलं प्रोक्तं संक्षेपेण द्विजोत्तम।
लग्नकर्मेशसम्बन्धादूह्यमन्यदपि स्वयम्॥ २२॥
पाठ का स्रोत और उपयोग अधिकार
संस्कृत विकिस्रोत के योगदानकर्ता · CC BY-SA 4.0 · सुरक्षित प्रति: 2026-10-11
विकिस्रोत से सुरक्षित इलेक्ट्रॉनिक पाठ; मूल मुद्रित संस्करण का OCR नहीं अध्याय और श्लोकों में विभाजन, नेविगेशन हटाया; पाठ की वर्तनी अपरिवर्तित।
अध्याय 21 · स्रोत संस्करण: https://sa.wikisource.org/w/index.php?title=%E0%A4%AC%E0%A5%83%E0%A4%B9%E0%A4%A4%E0%A5%8D%E0%A4%AA%E0%A4%BE%E0%A4%B0%E0%A4%BE%E0%A4%B6%E0%A4%B0%E0%A4%B9%E0%A5%8B%E0%A4%B0%E0%A4%BE%E0%A4%B6%E0%A4%BE%E0%A4%B8%E0%A5%8D%E0%A4%A4%E0%A5%8D%E0%A4%B0%E0%A4%AE%E0%A5%8D/%E0%A4%85%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83_%E0%A5%A8%E0%A5%A7_(%E0%A4%95%E0%A4%B0%E0%A5%8D%E0%A4%AE%E0%A4%AD%E0%A4%BE%E0%A4%B5%E0%A4%AB%E0%A4%B2%E0%A4%BE%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83)&oldid=74905